البكلاوة الشامية للشيف رضا العالم كاملة

مقادير العجينة:
كيلو وربع دقيق
كاشيك وربع ملح
كوب زيت نباتي
مايعجن من الماء

للتوريق:
سمنة
نشا

مقادير الحشوة:
كيلو لوز
200 ج سكر مطحون


الطريقة:
بالفيديو والكتابة بعدها

بالكتابة:

الطريقة:

- ناخد نصف كيلو سمن نسيحه في طنجرة علي نار هادية. بس ما نخلوشي يسخن هلبا.

تحضير العجينة:

نعجنو العجينة باليد أو بالخلاط.

- ناخد كيلو ونصف الدقيق نحطه في العجانة "ست البيت" نضيف عليه ملعقة وربع ملح ونشغل العجانة، ونضيف عليهم كوب زيت. بعدين نضيف عليهم شوي مي بالتدريج لين تصبح العجينة كويسة ومش رطبة هلبا "تقريبا كوب أو أكتر شوي ماء" .

نقسم العجينة الى 3 اجزاء ونسبكهم كويس "أهم نقطة في البكلاوة".

ناخد العجينة بعد ما سبكناها نبرمها باليد ويبقى شكلها مثل الرولا ونغطيها أو نغلفها بيش العجينة ما تتشققش ونخليها ترتاح.

بعدها نقسمها إلى قطع صغيرة نفطحها ونحطها علي سطح فيه نشا ونزيد نغربل عليها نشا من فوق ونزيد نفطحوها ونغمسوها أكتر في النشا ونحطها في كيس نايلون. ونحط كل 4 قطع علي بعضهم ونسكر عليها ونخليها ترتاح 10 دقائق.

بعدين ناخد كل قطعة نفردها بالرولا في النشا وندير عليها نشا وبعدها ناخد قطعة أخرى نفردها ونحطها علي القطعة الأولى وندير عليها نشا ونكمل بنفس الطريقة. وندير كل 9 ورقات علي بعضهم ونحطوهم في كيس نايلون ونخلوها ترتاح.

ناخد كل قرصة "9 ورقات" نديرلهم نشا نضغط عليهم باليد كويس ونفردهم في النشا جميع مع بعض كورقة وحدة بالرولا من فوق وبعدها نقلبهم ونفردهم من الجهة اللي تحت، وناخد الرولا نحطها في نصف الورقات وننفضهم بيش ينزل منهم النشا وتطلع تتقرمش بعد ما اطيب، بعدين نقصهم علي حجم الطاجين.

ونشيل منهم ورقتين ونخليهم علي جنب.

ناخد الطاجين ندهنه بالسمن ونحط فيه العجينة وانقب العجينة بالفركيتا "الشوكة" وبعدها ناخد ثلث كمية السمن ونصبه عالعجينة وبعدين نحط عليه الورقتين اللي شلناهم ونصب عليها اللوز المرحي بسمك اصبع أو أكتر ويكون متساوي.

ناخد قرصة أخرى "9 ورقات" نفردها بنفس الطريقة ونحطها علي اللوز في الطاجين، ونضغط عالحواشي كويس بيش الورقة الفوقية ما تنحنيش لما تسخن.

بعدها نقص البكلاوة في الطاجين بالطول مقاس صبعين وكذلك نقصها بالعرض بنفس المقاس.

بعدين نسقوها بالسمن، ونرشق عليها حبات اللوز. ونزيد نسقوها أكتر ونحطها في الفرن علي 180 درجة لمدة 35 إلى 40 دقيقة.

بعد ما اطيب نسقيها بالعسل ونخليها تشرب نصف ساعة وبعدين نقدموها.

ملاحظة:

نفرد العجينة لين تصبح رقيقة هلبا وكل ما نفرد العجينة اكتر يكون الناتج افضل.

عسل البكلاوة:

3 كيلو ونصف سكر.

نصف ملعقة ملح الليم.

نصف كوب ماء ونصف كوب عطر.

نحط المي والعطر والسكر عالنار 10 دقائق مع التقليب بعدها نضيف ملح الليم ونخليه 20 دقيقة عالنار ونشيله.

الأصابع:

- ناخد نفس الورقات اللي فردناهم في البكلاوة، ناخد كل ورقة بروحها نحشوها شوي لوز ونلفوها كويس ونسقوها بالسمن ونحطها في الفرن